630 մարդ աշխատանքը կորցնում է․ Ալավերդու ավագանին դիմել է կառավարությանը եւ նախագահ Սարգսյանին » Armennews

630 մարդ աշխատանքը կորցնում է․ Ալավերդու ավագանին դիմել է կառավարությանը եւ նախագահ Սարգսյանին

 

Ալավերդու ավագանին ուղերձ է հղել ՀՀ կառավարությանը եւ նախագահ Արմեն Սարգսյանին՝ խնդրելով կասեցնել արտագաղթի այն ալիքը, որը կարող է սկսվել Ալավերդու պղնձաձուլարանի փակման հետեւանքով։

«Շուրջ երեք ամիս է, ինչ պղնձաձուլական գործարանի աշխատողները եւ Ալավերդի քաղաքի բնակիչները սպասողական, անորոշ վիճակում են։ Ալավերդին ու ալավերդցիները սպասում են, թե ինչպես են իրենց հետագան տնօրինելու եւ իրենց փոխարեն որոշելու ՎՏԲ բանկը, ձեռնարկության սեփականատերը եւ ՀՀ կառավարությունը»,–նշված է ուղերձում։

Ավագանու անդամները ուղերձում պնդում են, որ ընդերքի հարստությունների առկայության պայմաններում չհիմնավորված շռայլություն է հանքարդյունահանող արդյունաբերության զարգացման պետական խելամիտ ծրագիր չմշակելը. «ՀՀ–ն պետք է դադարի հումքային կցորդ լինելուց՝ ոչ թե հանքարդյունահանող ձեռնարկությունները փակելու, այլ բնապահպանական լուծումներով հանքավերամշակող ձեռնարկություններ կառուցելու եւ մետաղական վերջնական արտադրանքով համաշխարհային շուկա մտնելու ճանապարհով: Հայաստանի Հանրապետության խտանյութը պետք է վերամշակվի ՀՀ-ում եւ դրանով իսկ նպաստի նոր աշխատատեղերի ստեղծմանը»:

Նրանք առաջարկում են գրավավարկային պարտավորությունների հարթության վրա պղնձաձուլական գործարանի համար 2019թ. մարտի 1-ը սահմանագծել որպես զրոյական վիճակ եւ վերագործարկել գործարանը:

NEWS.am-ի հետ զրույցում գործարանի աշխատակից Արմեն Կիրակոսյանը ասաց, որ աշխատավարձերը 2/3–ով են վճարվում, եւ այս ամիսը ներառյալ կվճարվի ու հետո երեւի թե պայմանագիրը կլուծարվի, եթե այլ զարգացումներ չլինեն։ Նրա խոսքով՝ գործարանի 630 աշխատող մնում է գործազուրկ։

Գործարանի աշխատակիցը նշեց նաեւ, որ նախորդ տարվա հոկտեմբերի վերջին եւ նոյեմբերի սկզբին կառավարությունը խոստանում էր, որ գուցե մեկ տարով կամ 1.5 տարով երկարացվի գործարանի աշխատանքը, մինչեւ նոր ներդրումներ կգան, սակայն հիմա դա էլ չի երեւում այդ պահին։ «Թուլտվություն են ուզում տան արտանետումների մասով, որ դրանք կրճատվեն ու այդպես աշխատի։ Բայց դեռ ամեն ինչ անորոշ է»,– հավելում է նա։

Նշենք, որ հոկտեմբերի 19-ին «Վալլեքս խմբի մեջ մտնող «Արմենիան Քափըր Փրոգրամ» ընկերության Ալավերդու պղնձաձուլական գործարանը դադարեցրեց իր աշխատանքը: Այն գրավադրվել էր «Վալլեքս խմբի» կողմից«ՎՏԲ Հայաստան» բանկում։ «ՎՏԲ-Հայաստան բանկը» հայտնել էր, որ «Արմենիան Քափըր Փրոգրամ» ընկերության Ալավերդու պղնձաձուլական գործարանն արդեն «ՎՏԲ-Հայաստան բանկի» սեփականությունն է:


скачать dle 11.0фильмы бесплатно

Նմանատիպ նյութեր